Il-karozzi elettriċi huma ideali għall-Malta, jistgħu jgħinu lil Malta tilħaq il-miri tagħha f’dak li għandu x’jaqsam ma’ tnaqqis ta’ tniġġiż minn gassijiet li qed iwasslu għall-bidla fil-klima, kif ukoll jgħinu biex jitnaqqas it-tniġġiż fl-arja f’ambjent urban. Biss f’Malta hawn biss 28 karozza elettrika minn total ta’ aktar minn 300,000 karozza li hawn fuq it-toroq Maltin. Mit-28 karozza elettrika, għaxra huma Valletta cabs, jew aħjar taxis li joperaw fil-Belt u l-Floriana.

F’diskors fil-Parliament f’Lulju li għadda, il-Ministru responsabbli mill-Bidla fil-Klima, George Puliccino, ħabbar it-twaqqif ta’ kumitat apposta biex jevalwa l-għoti ta’ inċentivi għal karozzi elettriċi.

Inċentivi bħal dawn kienu tħabbru fil-Baġit 2008 meta kien tħabbar li l-kienet se jingħata 20 fil-mija tan-nefqa kapitali fuq ix-xiri ta’ karozza elettriċi sa massimu ta’ €2,329 (Lm 1,000). Barra minn hekk, bħala parti mir-riforma tal-liċenzji għall-vetturi liċenzjati f’Malta li daħlu fis-seħħ b’effett mill-1 ta’ Jannar 2009, il-liċenzja annwali tal-vetturi elettrici hija ta' €75.00 kull sena u ma tinbidilx.

Biss jidher li effettivament dan l-inċentiv ftit li xejn ħajjar għax-xiri ta’ karozzi elettriċi, tant li skont ċifri ppubblikati dan l-aħħar mill-Uffiċċju Nazzjonali tal-Istatistika - UNS, mill-2008 ’il quddiem inxtraw biss ħames karozzi elettriċi, li minnhom erbgħa nxtraw fl-2008, u waħda fis-sajf tal-2009. Dejjem skont iċ-ċifri tal-UNS, fi tmiem ta’ Ġunju li għadda, f’Malta kien hawn 301,605 vettura reġistrata ma’ Transport Malta, li minnhom 76.4 fil-mija kienu privati, waqt li 15.7 fil-mija kienu kummerċjali.

IL-ĠENSILLUM online tkellmet ma’ sid ta’ waħda mill-28 karozza elettrika li huma liċenzjati f’Malta. Hu fisser din il-karozza bħala “ideali għal Malta”, li faċilment tilħaq il-limitu ta’ veloċità massima fit-toroq Maltin li huwa ta’ 80 kilometru fis-siegħa, b’mod speċjali fil-wita, li hi komda ħafna f’dak li għandu x’jaqsam ma’ parkeġġ u li mingħajr problemi ta’ xejn “twasslek madwar il-gżira kollha”. Barra minn hekk vettura elettrika għandha l-istess faċilitajiet bħal kwalunkwe vettura oħra fosthom arja kkundizzjonata, radju, central locking u allarm, għalkemm fisser li l-użu tal-arja kkundizzjonata tnaqqas xi ftit mill-kilometri totali li vettura tista’ tagħmel fuq charge.

Hu nnota li l-ikbar diffikultà hi n-nuqqas ta’ charging points madwar il-gżejjer Maltin. Mistoqsi dwar il-biża’ li jispiċċa stranded minħabba li l-karozza jispiċċalha ċ-charge. Innota li din qatt ma ġratlu f’kemm ilha għandu l-karozza, iżda nnota li sid ta’ karozza elettrika tajjeb li jieħu inkonsiderazzjoni d-distanzi li jkun se jkopri u jippjana t-traġitt tiegħu b’mod għaqli. Spjega wkoll li l-vettura elettrika tgħinek tkun iżjed attent fis-sewqan u hekk tiffranka iżjed enerġija, li jiġi utli anki meta dak li jkun isuq vettura bi fjuwil konvenzjonali.

Malta mhix l-uniku pajjiż fejn il-vetturi elettriċi ftit li xejn qabdu. Skond statistika ppubblikata online mill-Eurostat in-numri huma limitati fil-parti l-kbira tal-pajjiżi Ewropej, għajr għall-Olanda u l-Belġju. F’dawn iż-żewġ ‘pajjiżi baxxi’ fl-2008 kien hemm rispettivament 23,000 u 10,000 vettura elettrika. Fit-tielet post ikklassifikat in-Norveġja b’2,000 vettura. Pajjiżi oħra jew ma tawx statistiċi jew għandhom numri limitati. Hekk ir-Renju Unit kellu 1,000 vettura reġistrati fl-istess sena, l-istess daqs Ċipru, l-Isvizzera u r-Rumanija.

Fl-istess ħin pajjiżi madwar id-dinja qed jinvestu bis-sħiħ biex jiżdiedu l-għadd ta’ karozzi elettriċi fil-pajjiż. Rapport riċenti tal-Wall Street Journal innota li l-gvernijiet taċ-Ċina, l-Istati Uniti u Franza, bejniethom biss wegħdu li jagħtu $15-il biljun f’inċentivi fiskali, sussidji u bonuses biex jgħinu lill-manifatturi ta’ karozzi jiżviluppaw vetturi elettriċi. U l-kumpaniji ewlenin qed jagħmlu proprju dan. Kumpaniji kbar bħal Renault/Nissan, FIAT, Opel u Mitsubishi diġà ħabbru li fix-xhur li ġejjin se jkunu qed iniedu vetturi elettriċi li mistennija jkunu jħabbtuha ma’ dawk konvenzjonali.

Fil-blog personali tiegħu, il-Ministru Pulliċino għamel referenza għal dawn l-iżviluppi bħala raġuni ewlenija għat-twaqqif ta’ Kumitat Inter-Ministerjali “biex jistudja x’tip ta’ infrastruttura u inċentivi hemm bżonn li jkunu implimentati f’pajjiżna ħalli nħajjru aktar persuni jixtru karozzi minn dawn f’pajjiżna”.
Huwa fakkar li 16 fil-mija tal-emissjonijiet f’Malta huma kkawżati mill-karozzi u għalkemm il-karozzi elettrici jikkunsmaw elettriku prodott mill-power stations, minħabba li l-power stations huma iżjed effiċjenti minn vetturi żgħar, jikkontribwixxu biss terz tal-carbon dioxide ta’ karozzi konvenzjonali.

IL-ĠENSILLUM online tkellmet dwar dan maċ-Chairperson ta’ Friends of the Earth Martin Galea De Giovanni li laqa’ b’mod pożittiv il-ħatra ta’ dan il-Kumitat biex jistudja kif tista’ tiġi mgħejjun id-dħul ta’ karozzi elettriċi f’Malta.

Hu rrikonoxxa li vetturi elettriċi jista’ jkollhom impatt ambjentali bħat-tniġġiż, kawżat mill-power stations kif ukoll il-fatt li kull vettura tieħu tmien batteriji kemmxejn ikbar minn batterija ta’ vettura konvenzjonali. “Mod ikollok 30 karozza kif hawn illum, u mod ikollok 100,000,” huwa qal, waqt li fisser li dawn ikunu jeħtieġu infrastruttura adegwata fejn jiġu disposti.

Fl-istess ħin fakkar li vettura elettrika mhux bilfors tuża enerġija ġenerata minn sorsi konvenzjonali. Huwa semma li l-Università ta’ Malta tiċċarġja l-batterija permezz ta’ sistema fotovoltajka waqt li f’Kalifornja fl-Istati Uniti ddaħħlu sistema ta’ charging stations qishom stejġ tal-karozza tal-linja, liema stazzjonijiet huma mgħottija minn sistemi fotovoltajċi biex b’hekk l-enerġija wżata tkun kompletament nadifa.

Skont il-miri tal-Unjoni Ewropea għall-2020, Malta trid tkun qed tikkonsma madwar 10 fil-mija tal-enerġija fit-trasport minn sorsi alternattivi. Dan minbarra li trid tnaqqas it-tniġġiż globali minn gassijiet bħad-dijossidu tal-karbonju.

Galea De Giovanni fisser li vettura elettrika għandha range ta’ bejn 60 u 80 kilometru fuq charge waħda, jew prattikament it-triq kollha mill-Belt għaċ-Ċirkewwa u lura. Għall-vetturi preżentament importati f’Malta, charge tiswa ‘biss’ disa’ unit li jammonta għal €1.45 (il-prezz tal-petrol hu €1.22 il-litru waqt li dak tad-diesel hu ta’ €1.06 il-litru). Li jfisser li bil-prezz ta’ litru u nofs diesel, b’karozza elettrika tista’ tagħmel 80 kilometru!