Għal din is-sena se jibqgħu effettivi n-normi li kienu jeżistu s'issa.

Il-festi parrokkjali din is-sena se jiġu ċċelebrati skond in-normi li kienu segwiti fl-aħħar snin... għall-inqas sakemm ikunu ppubblikati normi ġodda.

Dan tħabbar fi stqarrija maħruġa lbieraħ mill-Kurja tal-Arċisqof.

Il-proċess ta’ konsultazzjoni dwar il-futur tal-festi parrokkjali tnieda f’Ottubru li għadda permezz tal-pubblikazzjoni tad-dokument 'Nirrestawraw il-Festi Flimkien', li kien ippreżentat mill-Arċisqof Pawlu Cremona OP. Id-dokument qajjem interess qawwi b’mijiet ta’ kontribuzzjonijiet fuq il-mezzi tax-xandir lokali, kif ukoll fuq il-websajt tal-Kurja, www.maltadiocese.org b’kontribuzzjonijiet bil-miktub.

Il-proċess ta’ konsultazzjoni għalaq nhar it-Tnejn 30 ta’ Novembru 2009.

“B’kollox daħlu 563 kontribuzzjoni differenti bil-miktub,” qal lil IL-ĠENSILLUM online il-kelliem għall-Kurja, Kevin Papagiorcopulo, waqt li fisser li l-parti l-kbira ta’ dawn il-kontribuzzjonijiet kellhom aktar minn punt wieħed.

Il-kontribuzzjonijiet kienu varjati għall-aħħar u kienu jinkludu kummenti li jaqblu u oħrajn li ma jaqblux ma’ xi parti tad-dokument. Oħrajn taw suġġerimenti prattiċi dwar aspett jew ieħor tal-festi parrokkjali skond kif indirizzati fid-Dokument.

Il-Kurja Arċiveskovili spjegat li l-kontribuzzjonijiet ġew minn spektrum sħiħ ta’ persuni jew istituzzjonijiet b’xi mod involuti fl-organizzazzjoni tal-festi parrokkjali: minn kappillani u kunsilli pastorali parrokkjali, għal fratellanzi, każini tal-baned, għaqdiet oħrajn parrokkjali kif ukoll minn individwi.

“Daħlu wkoll il-kummenti mill-Għaqda tal-Każini tal-Baned, mill-Għaqda Piroteknika, mill-Għaqda Nazzjonali tal-Armar, u mill-Għaqda tal-Kampnari,” qalet l-istqarrija fir-rigward ta’ dokumenti voluminużi b’diversi kummenti u proposti li ngħataw minn għaqdiet li jirrappreżentaw istituzzjonijiet organizzati.

Fost dawk li taw ukoll il-kummenti tagħhom b’mod formali kien hemm il-Kummissjoni Ambjent tal-Arċidjoċesi.

Fil-ġimgħat li għaddew, diversi membri ta’ gruppi impenjati fl-organizzazzjoni tal-festi u li tkellmu informalment ma’ IL-ĠENSILLUM online irrimarkaw li ż-żmien qed jagħfas biex jiġu ffinalizzati t-tħejjijiet għall-festi parrokkjali tas-sajf li ġej.

“Diġà kien hemm il-festa ta’ San Pawl, u fi ftit ġimgħat oħra jmiss lil San Ġużepp u lil San Publiju. Dawn, normalment jiftħu l-istaġun tal-festi. Fi żmien il-konsultazzjoni kien intqal li n-normi l-ġodda se joħorġu qabel ma jiftaħ l-istaġun ħalli jkunu japplikaw għal kulħadd... allura x’se jsir? U kif ma smajna xejn iżjed?” staqsa Matthew*, żagħżugħ impenjat f’wieħed mill-każini tal-banda fiż-Żurrieq iktar kmieni din il-ġimgħa.

Papagiorcopulo fisser li wara li għalaq iż-żmien ta’ konsultazzjoni, il-Kurja nediet proċess ta’ analiżi tal-kummenti kollha li daħlu permezz tal-imejls, tal-ittri, tal-kitba fil-ġurnali kif ukoll dak li ntqal fuq il-mezzi l-oħra tax-xandir.

Minkejja d-diskusssjoni estensiva fuq medda ta’ xahrejn dwar id-dokument 'Nirrestawraw il-Festi Flimkien', f’Diċembru, l-Arċidjoċesi kkummissjonat stħarriġ xjentifiku li tmexxa mis-soċjologu l-Professur Mario Vassallo, dwar il-festi u kif in-nies iħarsu lejn il-festi. Bħala parti mill-istess stħarriġ sar ukoll paragun ma’ kif l-istess persuni għandhom relazzjoni ma’ Alla u mal-Knisja fil-kumplament ta’ ħajjithom.

“Prof Vassallo ta r-rapport tiegħu fil-bidu ta’ Frar u dan qed ikun analizzat bil-ħsieb li aktar tard, dan it-tagħrif ikun ippubblikat,” qalet il-Kurja fl-istqarrija tagħha.

Intant, qed jitkompla l-proċess ta’ konsultazzjoni fid-dawl ta’ dak kollu li ntqal u li nstab dwar x’jixtiequ l-Maltin mill-festi parrokkjali, u preżentement, spjegat l-istess stqarrija, għaddejjin laqgħat mal-għaqdiet nazzjonali li kkontribwew għad-diskussjoni dwar id-dokument 'Nirrestawraw il-Festi Flimkien' fid-dawl tal-korrispondenza li bagħtu.

“Il-mira tal-Arċidjoċesi hija li nippruvaw noħolqu consensus,” saħqet il-Kurja, waqt li fissret li minbarra d-diskussjonijiet ma’ dawk involuti fl-organizzazzjoni tal-festi ta’ barra, iridu jsiru wkoll laqgħat mal-Awtoritajiet Ċivili.

Il-Kurja spjegat ukoll li minħabba li l-proċess ta’ konsultazzjoni mhux se jkun konkluż sakemm jiftaħ l-istaġun tal-festi ftit ġimgħat oħra, u għalhekk id-dokument finali dwar il-festi mhux se jkun għadu ġie ppubblikat, “sakemm ikun approvat u ppubblikat id-dokument il-ġdid, għal din is-sena jibqgħu effettivi n-normi li kienu jeżistu sal-lum”.